शिक्षा का उद्देश्य 💭
shiksha ka uddeshya
Shiksha ka udeshya kewal kuchh paatho ko yaad karakar unki pariksha karna nhi hai apitu ek balak/balika ko uske agrim jeevan ke liye aarthik or samajik rup se taiyaar karna hai. Parntu iss samay jis prakaar ki padhayi schoolo me karai jar hi hai wo rattamar pratiyogita ki disha me agrasar dikhayi de rhi hai.
Meri prarambhik shiksha ka ek chhota sa bhaag mere gao bhaintla me beeta hai jo ki uttrakhand ke tehri jile ka ek chhota sa gaon hai jaha uss samay tak sadak bhi nhi pahunch saki thi. Agar delhi se mere gaon jana ho to sadak khatam hone ke baad 10 km pahadi raste ka safar karne ke baad aap waha pahunch sakenge, par ye uss samay ki baat hai yadi aaj aap jana chahe to sadak apko mere gaon tak bhi pahuncha degi. Par kyunki main 20 varsh purv ka vivran kar rhi hu to yaad rakhe waha sadak nhi hai to jaisa ki ek kahawat hai
“jaha sadak nhi, waha suvidha nhi”
Isliye shikasha vyavastha bhi kuchh purani filmo ke gaon jisa hi thi isiliye mere pitaji/papa jo uss samay delhi me ek truck driver the unhone mujhe or mere bhai ko ek achhi shiksha dilane hetu hume delhi apne saath hi le aaye yakin kare hum ek 6*7 ke kamre me raha karte the par kyunki mere pitaji/papa shiksha ke mahatv ko bhali bhanti samajhte the unhone gaon ki haveli me rehne se behtar sheher ke chhote se kiraye ke kamre me rehna behtar samjha. kyunki hum akele nhi the or humare baad aise kayi parivaar the jo apne budhe maa baap ko gao me chhodkar apne bacho ki shiksha hetu shehro me visthapit ho gaye. Or pahad sune hote chale gaye unki raunak kam hoti chali gayi. Or aap jante Hain ye raunak wapis kaise aayi corona se ji haa! Jab lockdown laga to sabhi ne kiraye ke makan se jyada surakshit apne gaon ke gharo ko samjha or wapsi ko laute uske baad pahado ne fir wahi chehel pehel dekhi jo barso se gayab thi or shehro ne wo viran sannata dekha jo wo dubara kabhi nhi dekhna chahega.par sarkar ko iss mauke ka fayda uthakar shiksha vyavastha ko iss prakar behtar karna chahiye ki ye sabhi majburi me wapis sheher ko lautne ki ichha na rakhe. Maaf kijiyega main Vishay se bhatak gayi hu par corona kaal hum sabki zindagi ka aisa hissa hai jiska zikar kiye bina jivan katha kucch adhuri lagegi
Khair, Meri paanchvi tak ki shiksha nagar nigam ke school me hui hai. Yaha main apni ek uplabdhi ka zikr bhi karna chahungi ki kaksha 4 me maine govt. dwara aayojit medhavi pariksha jo kaksha 4 or 5 ke liye aayojit ki jaati thi , me safalta haasil ki or 500 rupay ki dhanrashi inaam me prapt ki . ye pariksha mere vidyalay se 100 chhatro ne di or main akeli thi jisne ye pariksha paas ki aaj iska kya mahatv kitna hai main nhi jaanti par uss samay mere liye ye mere pitaji/papa ko khush karne ka ek bada mauka tha. Kaksha 5 me bhi maine ye pariksha di or safalta ke rup me 800rupay ki dhanrashi prapt ki. Par main shuru se hi ek achhi chhatra nhi thi humari bhul or galtiya hi hume aage ki raah me sidha chalna sikhati hai tisri kaksha ka ek vakya hai jab main class me last bench par baithe baithe apni ek saheli ke saath copy ke pichhe bollywood ke gaane likha karti thi or ek din jab pitaji/papa ne copiyan check ki to bahut daant padi or thodi si maar bhi. Uske baad se maine apni uss saheli ka saath chhod diya jiska aaj mujhe naam bhi yaad nhi hain parantu aaj jab main is par vichar karti hu, to mann me khayal aata hai ki uss ladki ka saath chhodne ke bajay main use apne saath lekar usko bhi shi disha me kyun nhi lai? Par ummed karti hu ki wo umar bahut kam thi or aage chalkar meri tarah usne bhi sahi disha payi hogi or aaj wo ek sushikshit ladki hogi.
Kaksha chhati se barhvi maine ‘rajkiya sarvodaya kanya vidyalay,delhi’ se ki,
Jis prakar ek ahinsa wadi ki prerna Gandhi ji, rajneta ki prerna ek rajnitigya, vigyan ki disha me karya kar rhe vyakti ka ek vaigyanik, kanshiram ji ke baba sahib ambedkar ho sakte hain ussi prakar ek shikshak trainee ki prerna bhi ek shishak hi hote hain aisa maana jata hai parantu aisa jaruri bhi nhi rajnitigya ki prerna uska tatkalin samaj ko behtar banana bhi ho sakta hai or shikshak ka prerna strot kal ke bhavishya nirmatao ko shikshit karne ki ichha bhi ho sakti hai
Jab main iss baat par vichar karti hu ki mere mann me ek shikshak banne ka khayal kab or kiske karan aaya to mere dimag me ek hi vyakti ki chhavi ubharti hai – “SHASHI PRABHA MAM” mere liye ye kewal ek naam nhi hai shikshak ka chitra hai jo saadgi, sneh,dhairya,imandari , ek dhimi mithi muskaan or gyaan ka sagar, jaise rango se chitrit hai par ye khayal ki main unhi ki tarah ek teacher banna chahti hu mere mann me ussi samy nhi aa gaya tha jab wo mujhe padhati thi or meri kaksha adhyapika thi. Par jab maine pehli naar yeh socha ki mujhe shikshak banna chahiye to wo vah pehli adhyapika thi jinki chhavi ke rup maine khudko dekhna chaha.
Unhi ki motivation or mehnat ki vajah se maine district level par speech competition me 1st prize jita, school ki har patiyogita me bhagidari ke liye protsahit karna or sirf mujhe hi nhi balki class ki har ladki ko uski pratibha anusar kaam dena or anya kaamo ke liye protsahit karna.
Ek shishak banne ki ichha mere mann me isliye bhi hai kyunki mere dadaji ek teacher the maine unhe kabhi dekha nhi kyunki jab pitaji/papa 14 varsh ke the tabhi unhi ka ek bimari ke karan nidhan ho gaya. Isliye jab main kehti hu ki main ek teacher banna chahti hu to mere ghirwalo ko bahut khushi hoti hai main uss din ke liye mehnat karungi ki jis din main ek school classroom me wapis khadi hongi par ek teacher ke roop me. Or apne saamne jab un bacho ko baitha dekhungi jo mujhse kuchh sikhne or mujhe kuchh sikhane baithe honge
School tak ka safar kuchh aisa hi rha kuchh pratiyogitaye, tin dost, teachers. School ki chardiwari ke andar ka safar bahut sugam or aasan hi laga pareshani to tab hui jab iss chardiwari ke bahar nuikalna padha.
/Mere saath to college admiision me bhi ek gadbad ho gayi /main jab apna admission lakshmibai college me karane gayi to /mujhe du ki koi khas jankari nhi thi to main apna admission /ncweb[non collegiate for woman and education
Maine BA Arts me lakshmibai college me admission liya jo bilkul ek alag duniya thi. Bahut saare log alag alag class, status, states, par yaha mere paas ek comfort zone bhi tha meri school ki best friend college me bhi mere saath hi thi or saath hi school ki ek class mate bhi
Par pata hai yaha sabse bada panga kya tha ? bhasha! yahi se shuru hua mera bhasha vishleshan du jaisi badi university ke paas bhi hindi me notes nhi hain har baar ek hi jawab ki jab kisine books ko hindi me translate hi nhi kiya to hum kya kare koi nhi humne padha English medium ke note ko samajh samajhkar apne notes banaye, library ki booke chhan mari or ache numbaro se paas bhi hue, pareshani ye hai ki ye sabhy samaj hindi ko swikar nhi karta or main engkish ko nhi apna paati. Main barahvi tak English padhi hai college me bhi padhi hai aisa nhi hai ki mujhe English nhi aati main wo hi ladki hu jisne lockdown me 40 se jyada dramas aise dekhe jo bhartiya nhi the or English subtitle me the main english ko achhi tarah samajhti hu par use apni or apne shikshan ki bhasha ke rup me swikar nhi kar pati hu.
Mujhe padhne or padhane ka itna shauk hai ki main tuition tab se padha rahi hu jab main dasvi me thi, par mujhe aaj bhi apne padhane ke tariko me bahut si galtiya nazar aati hain or jab se giast me aayi hu or sikh rahi hu tab se to eke k kami ko main saaf saaf dekh pa rahi hu badalne ki koshish bhi kar rahi hu.
Apni issi khusi ke liye apne college ki taraf se main wazirpur gaon me kuchh garb bacho ko padhane shanivaar or ravirar ko jaya karti thi shuruaat me humne unhe road ke side me hi padhana shuru kiya jaha garmi ki tez dhoop me bacho ka waha baith pana bahut mushkil ho jata tha or jis din bache jyada aa jate jagah ki kami bhi padh jati thi baad me hume paas hi k eek mandir ke trusty ne mandir ke andar hi padhane ki jagah bhi di
Bacho ke liye suvidhaye badhane me to hum safal rahe par mujhe iss batt ka afsos hua ki college ki jitni chhtrae shuru ke hafto me padhane aayi thi kuchh samay baad we sabhi kam hoti chali gayi or humari sankhya addhi se bhi kam reh gayi. Par kaam nhi ruka ye sabse achhi baat hai, college khatam hone ke baad mera waha jaakar padhana to mushkil ho gaya par kuchh kuchh samay baad main unse milne chali jaya karti hu or unka dher sara pyaar bator lati thi , haa par corona ki wajah se march ke baad se mera waha jana nhi ho paya ummed karti hu ki main bahut jald hi unhe dekhungi ki aaj wo kitne bade ho gaye hain? Or ye samay unke liye kitna bhari tha or unhone iska samna kaise kiya yaha main in bacho ka zikr isliye akr rhi hu kyunki yahi wo bache hain jinke wajah se main ek sarkari school ki teacher banna chahti hu, hum sabhi jante hain ki sarkari school me kis tarah ki padhai hoti hain or bacho par teacher kitna dhyan dete hain main ek sarkari school ke bacho ko padhana chahti hu or chahti hu ki wo bhi kisi mamle me private schoolo ke bacho se kamtar na ho kyuki gyan ka koi aarthik varg nhi hota.
